Woñmaanlok Peba in Kakien Maron ñan an Juon Armej Kõmadmōd ikijen Jāān

Juon peba in kakien ej kōmman bwe kwōn maron kelet juon mōttam ak nukkum eo kwōmaron kōjatdikdik kake bwe en jibañ kwe kōmmane kelet ko ikijen jāān im/ak taktō. Ālikin am jaini, armej eo kwōj kelet bwe en wōr an maron in kenono ibben taktō ro am, pāān, jikuul, im jikin ko jet ñan kōmmane kelet ko im jain koontoreak einwōt ñe er kwe.

Armej eo mōttam ak nukkum kwōmaron kōjatdikdik kake im kelet bwe en jibañ kwe kōmmane kelet ko ikijen jāān im/ak taktō etannin armej eo ej “kōmadmōd” ñan kwe.

Kakien in maron ej “woñmaanlok” elañe ej ba armej eo ej kōmadmōd ñan kwe emaron kōjerbale jekdoon ñe kwōnaj nañinmej ak jorrāān im jab maron make kōmmane kelet ko ñan kwe.

Kwōj aikuj jaini peba ko ej Woñmaanlok Peba in Kakien Maron imaan juon rikamool eo enaj jitaame. Ñe kwōjab maron loe juon rikamool eo ej jitaame peba eo, kwōmaron jaini imaan ruo armej ro “ejellok wūnin aer maron jibañ kwe”. Bōtab, emmonlok rikamool eo ej jitaame, elabtata ñen juon peba ej Woñmaanlok Peba in Kakien Maron ñan an Juon Armej Kõmadmōd ñan Jāān. 

Ālikin am jaini peba ko, kōmmane 2 kabe. Lelok peba eo jinoin ñan armej eo ej kōmadmōd ñan kwe, lelok juon kabe ñan armej eo juon enaj kōmadmōd ñan kwe, innem likūt juon kabe ibbam. 

Aet. Kwōmaron kaanjel ae (kwōmaron kabōjrak) kakien in maron jabdewōt ien ibben juon kōjella ilo jeje ñan armej eo ej kōmadmōd ñan kwe. 

Ālikin am kabōjrak peba in kakien maron eo am emoor, kwōmaron jaini peba in kakien maron eo ekāāl ñan kelet bar juon armej eo ej kōmadmōd. Ilo peba in kakien maron eo am ekāāl, loloorjak an ba ke aoleb peba in kakien maron ko moktalok emōj kabōjrak aer jerbal.

Jet ien juon pāān ak bar juon bejnej enaj ba lok ñan armej eo ej kōmadmōd ñan kwe rebañ bōk peba in kōmelim maron eo am. Ewōr 2 wāween ko ekkā mennin emaron walok:

1. Peba eo Ejab Jitaam jen Rikamool. Kakien eo an Washington ej ba ke ejejjet kūtien peba in kakien maron ilo ien kwōj jaini imaan juon rikamool ej jitaame ak imaan ruo rikamool ro ejellok wūnin aer maron jibañ kwe. Bōtab jet pāān im bejnej ko jet rej aikuj an jitaam jen rikamool. Kwōmaron jaini peba eo ekāāl imaan juon rikamool enaj jitaame. Bōtab armej eo ej kōmadmōd ñan kwe emaron bar kajjitōk an kenono ibben opij eo aer ej lale kakien im kwalok Kakien ko Emōj Kakobaba Melele an Washington (RCW) 11.125.050. Ñe ejimwe aer kar kamool an jain peba eo am jen ruo kamool rejab ebaake kwe im jab jitaam jen rikamool, peba eo enaj jerbal wōt iomwin kakien eo an Washington. Pāān eo am aikuj bōke.
2. Peba eo Ejab “Jimwe”. Peba in kakien maron ko ilo peij in ejejjet kūtien iomwin kakien eo an Washington, bōtab jet pāān im bejnej ko jet rekōnaan kōjerbal peba eo aer make. Ñe juon pāān ak bar juon bejnej ejab bōke peba in kakien maron eo am, armej eo ej kōmadmōd ñan kwe emaron kajjitōk an kebaak opij in loar eo aer innem kwalok 
   RCW 11.125.050 im RCW 11.125.200(3)(a).

Remaron kajjitōk peba in kamool ibben armej ro rej Kōmadmōd. Pāān eo emaroon ba renaj bōk wōt peba in kakien maron ñe armej eo ej kōmadmōd enaj jaini juon peba in “kamool” ej kalikar ke ejejjet peba in kakien maron. Mennin ej juon kakien. Bōtab, ñe pāān eo ekōnaan peba in kamool, rej aikuj kajjitōke iloan 7 raan jen raan eo kwar lelok peba in kakien maron. Armej eo ej kōmadmōd wōt aikuj jaini peba in kamool eo. 

Kajeoñ in bōk jibañ ikijen kakien ñe juon pāān ak imōn jerbal ejab lewaj am peba ak aikuj am kōjerbal peba ko aer.